Formaðurin heiðraður

Í samband við gallaveitsluna hjá judo, borðtennis og badminton aftan á felags FM-kappingarnar í gjár vóru ymiskar heiðringar á skránni.

Judosambandið og tey trý judofeløgini valdu í hesum sambandi at heiðra formanninum, Sofus Debes Johannesen, fyri í trý áratíggjur at verið í fremstu røð í fyriskipaini av judo í Føroyum.

Sofus varð valdur í nevndina í Judosambandinum í 1982, árið eftir at sambandið var stovnað.

Í 1985 gjørdist hann formaður og tað var hann so, til hann legði frá sær 5 ár seinni í 1990. Men longu í januar 1993 var boð eftir honum aftur, tá hann gjørdist næstformaður. Tá so formaðurin sama summar flutti av landinum, bleiv Sofus aftur formaður.

Og síðani á sumri 1993 hevur Sofus sitið sum formaður uttan íhald. Hetta valdu Judosambandið og tey trý judofeløgini at takka honum fyri við einum skreytblaði, einari bók og einum gávukorti, sum hann vónandi fær gleði av.

Judosambandið takkar Sofus Debes Johannesen, formanni, fyri arbeiði føroyskum judo at frama higartil!

Aleksandur fekk fightersteypið

Tað bleiv Aleksandur Christensen úr Sunda Judofelag, ið fekk "Fighter-steypið" í ár.

Hóast Aleksandur bara hevur vant judo í eini 3 ár, so hevur hann frá byrjan víst sera stóran áhuga fyri at venja og læra teknikkir, og hann hevu klárað seg serliga væl í kappingum, bæði í sínum egna aldursbólki, eins og hann eisini hevur gjørt vart við seg millum eldri leikarar.

Eisini úrslitini hjá honum hava verið serstakliga góð.

Í FM-kappingini í ár var hann eisini í aðrari bronsufinaluni, sum hann eisini vann, so hann er heilt vist ein virðiligur vinnari av "fighter-steypinum" í ár!