Lóg Sunda Judofelags

Grein 1: Navn felagsins 

Navn felagsins er SUNDA JUDOFELAG "TORI", stytt SJF "Tori", og heimstaður felagsins er Oyrarbakka.  

Grein 2: Endamál felagsins 

Endamál felagsins er at íðka judo og kiu-jitsu og um møguligt at líva upp gomlu føroysku brókatøkini. 

Grein 3: Limaskapur

Ein og hvør kann gerast limur við at venda sær til annaðhvørt ein nevndarlim ella venjara. Ein samd nevnd kann nokta persóni limaskap.

Verður persóni noktaður limaskapur, kann hann leggja spurningin fyri fyrstkomandi aðalfund til støðutakan.

Feløg og onnur áhugaði, kunnu gerast hvílandi limir.

Nevndin ásetur støddina á limagjaldinum fyri virknar-, hvílandi- og ungdómslimir. Limur kann siga limaskap sín upp við einum mánaða freist til ein 1. í einum mánaði. Nevndin kann koyra lim úr felagnum, um viðkomandi er í eftirstøðu við limagjaldi í meira enn 1 ár, hevur brotið viðtøkur felagsins ella á annan hátt grovt hevur forbrotið seg.

Viðkomandi limur kann leggja spurningin fyri fyrstkomandi aðalfund til støðutakan.

Felagið kann útnevna heiðurslimir.

Grein 4: Aðalfundir

Aðalfundurin, sum verður hildin í heimstaði felagsins, er hægsti myndugleiki felagsins. Ársaðalfundur verður hildin áðrenn apríl mánaður er farin.

Nevndin kallar inn til aðalfundar við lýsing á heimasíðuni www.judo.fo við í minsta lagi 14 daga varningi. Í innkallingini skal verða sagt frá fundarstaði, -tíð og -skrá.

Mál, sum limir vilja hava til viðgerðar, skulu vera nevndini í hendi í minsta lagi 10 dagar undan aðalfundinum. Í fundarboðunum verða innkomin mál stutt endurgivin, men skulu liggja frammi í fullum líki á skrivstovu felagsins í minsta lagi 8 dagar undan fundinum.

Á ársaðalfundinum er fundarskráin hendan:

1 Val av fundarstjóra.

2 Frágreiðing nevndarinnar fyri farna árið.

3 Framløga av roknskapi og fíggjarstøðu til góðkenningar.

4 Val av nevndarlimum og tiltakslimum.

5 Val av grannskoðara.

6 Innkomin mál.

7 Ymiskt.

Fundarstjórin ger av í øllum ivaspurningum á fundinum. Hann kann vera nevndarlimur. Atkvøðugreiðsla fer fram skrivliga, um ikki aðalfundurin góðkennir annan atkvøðuhátt. Atkvøðast kann sambært fulltrú.

Fundarstjórin ger av gildi hennara.

Bert limir, sum hava fylt 14 ár, hava atkvøðurætt. Valbærur er limur, sum er fyltur 18 ár.

Hvílandi limir hava møti- og talurætt, men tó ikki atkvøðurætt.

Grein 5: Eykaaðalfundir

Eykaaðalfundur verður hildin, tá ið nevndin heldur tað vera neyðugt ella tá ið 25 limir krevja tað. Mannagongdin á eykaaðalfundi er tann sama sum á ársaðalfundi

 

 

Grein 6: Nevndin

Felagið verður stýrt av eini 3-5 manna nevnd. Nevndarlimir verða valdir annaðhvørt ár. Soleiðis at líka ár ár standa 1-2 fyri vali og ólíka ár standa 2-3 fyri vali. Nevndin skipar seg sjálv.

Tiltakslimir verða valdir fyri sama tíðarskeið. Nevndin heldur fund, so ofta hon heldur tað vera neyðugt. Nevndin er viðtøkufør, tá ið minst helvtin av nevndarlimunum eru á fundi.

Nevndin kann gera reglugerð fyri virksemi sítt. Fer nevndarlimur frá í úrtíð, kemur fyrstvaldi tiltakslimur í hansara stað.

Gerðabók verður førd fyri allar aðal- og nevndarfundir.

Grein 7: Tekningarreglur

Felagið verður teknað av samlaðu nevndini. Til keyp, sølu ella veðseting av føstum ognum krevst aðalfundarsamtykt.

Grein 8: Heftilsi

Felagið heftir bert fyri skyldum sínum við teimum til eina og hvørja tíð verandi ognum, sum hoyra felagnum til. Limirnir ella nevndin hefta ikki persónliga fyri felagsins skyldum, men bert við sínum limagjaldi.

Grein 9: Roknskapur

Roknskaparár felagsins er frá 1. januar og til 31. december.

Roknskapurin verður grannskoðaður av einum á aðalfundi valdum grannskoðara, sum hevur rætt at kanna felagsins bøkur og skjøl, tá ið hann ynskir tað.

Grein 10: Viðtøkubroytingar

At broyta viðtøkurnar krevst, at í minsta lagi 2/3 av møttu limunum atkvøða fyri.

Grein 11: Avtøka

At taka felagið av krevst, at í minsta lagi 2/3 av limum felagsins eru á fundi og samstundis eisini atkvøða fyri. Er ikki neyðugi meirilutin av limunum á fundi, kann nevndin kalla inn til eykaaðalfundar, har felagið kann verða tikið av, um 2/3 av givnum atkvøðum eru fyri, líkamikið hvussu nógvir limir eru møttir.

Verður felagið tikið av, velur aðalfundurin ein ella fleiri likvidatorar. Eitt møguligt avlop skal nýtast til eitthvørt ítróttarligt ella vælgerandi endamál.